Русија никогаш не одбила да преговара за Украина, а ако другата страна го сака тоа, тогаш треба да го каже тоа, изјави денеска рускиот претседател Владимир Путин.
„Веќе реков: никогаш не сме одбиле да преговараме. Значи, ако другата страна сака, нека каже директно“, рече рускиот лидер, додавајќи дека, сепак, другата страна не се огласува, пренесува ТАСС.
Путин нагласи дека Русија никогаш не била закана за никого.
„Најголемите закани што се појавуваат во денешниот свет ги создаваат сегашните владејачки елити на Запад“, рече Путин.
Тој исто така рече дека 300.000 доброволци веќе се пријавиле за учество во руската специјална операција во Украина и во исто време ги отфрли обвинувањата за регрутирање доброволци од Северна Кореја, пишува РИА Новости.
„Пред неколку дена кажав дека нашите војници потпишаа договори со вооружените сили на Руската Федерација, 270 илјади од нив, но тоа е веќе застарена информација. Утрово објавија – 300.000 договори потпишаа луѓе кои се подготвени да ги жртвуваат своите животи во интерес на својата татковина, штитејќи ги интересите на Русија“, рече Путин, одговарајќи на прашања на новинарите во Сочи по средбата со претседателот на Белорусија, Александар Лукашенко.
