Претседателот на државата Стево Пендаровски, во рамки на учеството на Генералното Собрание на Обединетите Нации, денеска присуствуваше на отворањето на Политичкиот форум на високо ниво за одржлив развој под покровителство на Генералното Собрание и се обрати на лидерскиот дијалог „Зголемување на активностите на клучните транзиции за да се забрза напредокот на Целите за одржлив развој“.
Во своето обраќање претседателот Пендаровски истакнал дека со поддршка на агенциите на ОН и донаторска поддршка, постигнавме напредок во постигнувањето на Целите за одржлив развој и државата утврди три главни национални обврски: инвестирање во развивање на вештините за иднината како предуслов за економски раст, зголемување на уделот на обновливите извори на енергија за поддршка на климатската акција и енергетската одржливост и усвојување на Националната развојна стратегија, која заедно со Рамката за развој МКД2030 треба да ги рационализира сите Цели за одржлив развој во македонското општество.
– Акумулираните ризици и кризи на денешницата се само предзнак на иднината што го чека нашиот свет доколку навреме не ги спроведеме Целите за одржлив развој. Само со смели, амбициозни и праведни постапки можеме да избегнеме такво сценарио, истканал Пендаровски.
Северна Македонија, нагласил, ја усвои Рамката за соработка за одржлив развој 2021-2025 година, а со поддршка на агенциите на ОН и донаторска поддршка, постигнавме напредок во постигнувањето на Целите за одржлив развој и утврдивме три главни национални обврски.
За инвестирање во развивање на вештините за иднината како предуслов за економски раст, рекол Пендаровски, ни е потребно образование приспособено на потребите на пазарот на трудот, намалување на родовиот јаз во областите на СТЕМ и создавање работни места за младата, дигитална генерација.
– Второ, зголемување на уделот на обновливите извори на енергија за поддршка на климатската акција и енергетската одржливост во согласност со зајакнатите национално-определени придонеси, Националната стратегија за енергетски развој и Долгорочната стратегија за климатска акција. Трето, усвојување на Националната развојна стратегија, која заедно со Рамката за развој МКД2030 треба да ги рационализира сите Цели за одржлив развој во македонското општество преку градење консензус кој ги надминува етничките, верските, генерациските и политичките разлики, потенцирал шефот на државата.
Пендаровски нагласил дека доброто владеење, владеењето на правото и антикорупцијата се клучни за оваа цел.
