Петмина Бугари во Велика Британија се обвинети за шпионажа во корист на Русија,објавуваат светските агенции.
Тројца мажи и две жени, на возраст од 29 до 45 години, се обвинети дека меѓу август 2020 година и февруари годинава, заговарале „собирање информации наменети директно или индиректно да бидат корисни за непријателот, со цел што им штети на безбедноста и интересите на државата“, соопштија од британското обвинителство.
Бугарските државјани се обвинети за заговор во периодот од август 2020 до февруари 2023 година за собирање информации кои би биле корисни за непријателот.
Обвинението уследи по истрагата на лондонската полиција. Тие се обвинети дека работеле на активни операции во Велика Британија и Европа и собирале и препраќале информации до руската држава.
Долги години живееле во Велика Британија. Кога беа уапсени во август, Би-Би-Си објави дека кај нив биле пронајдени лажни документи како лични карти и пасоши. Имале документи и од Бугарија, Франција, Шпанија, Италија, Грција, Словенија, Велика Британија, Чешка и Хрватска.
Кои се Бугарите обвинети за шпионажа?
Орлин Русев има историја на водење бизнис во Русија. Тој се преселил во Велика Британија во 2009 година и поминал три години работејќи во техничка улога во финансиските услуги. Неговиот профил на LinkedIn наведува дека тој подоцна поседувал компанија која се занимавала со разузнавање на сигнали, што вклучува следење на комуникациите или електронски сигнали, пишува Би-Би-Си.
Русев, чија последна адреса е приморска куќа за гости во Грејт Јармут, исто така вели дека некогаш бил советник на бугарското Министерство за енергетика.
Во Хароу, поранешните соседи ги опишаа Бизера Замбазов и Катрин Иванова како пар. Замбазов е опишан како возач, а Иванова спроред профилот на LinkedIn има лабораторија за приватен здравствен бизнис.
Брачниот пар кој се преселил во Британија пред десет години водел социјална организација која обезбедувала услуги за Бугарите, вклучително и запознавање со „културата и нормите на британското општество“. Според бугарските државни документи на Интернет, тие работеле и за изборни комисии во Лондон кои им овозможуваат на граѓаните кои живеат во странство да гласаат на бугарските избори, пишува Би-Би-Си.
