Адвокатот на Доналд Трамп, Кристофер Кис, ја обвини њујоршката обвинителка Летиција Џејмс дека „игнорирала сè“ за време на граѓанската тужба поради наводната систематска измама на Трамп во неговата семејна компанија.
Адвокатот на Трамп го изнесе своето обвинение за време на сослушувањето во државниот суд во Њујорк, само 10 дена пред судењето закажано за 2 октомври, пренесува Ројтерс.
Судијата Артур Енгорон, кој претседава со случајот, ги разгледува аргументите на синовите на Трамп, Доналд Џуниор и Ерик и Организацијата Трамп, кои бараат од судот да го отфрли случајот бидејќи никој не бил измамен или повреден, а барањата се застарени.
Спротивно на нивните тврдења, Џејмс сака обвинетите да одговараат за измама.
Судијата Енгорон планира да донесе одлука за предлозите на двете страни на 26 септември, сугерирајќи дека се во прашање поголеми принципи.
„Тоа што никој не е повреден не значи дека случајот ќе биде отфрлен“, рече тој на рочиштето кое траеше речиси пет часа.
Трамп има силно водство во трката за републиканска претседателска номинација во 2024 година и покрај тоа што се соочи со четири кривични пријави, во кои тој се изјасни за невин.
