Некои од оружјата што Берлин му ги дал на Киев за да помогне во борбата против Русија биле или во лоша состојба или застарени, призна германската министерка за надворешни работи Аналена Бербок.
Во интервјуто за Си-Ен-Ен објавено во понеделникот, Бербок ги призна големите технички проблеми со оружјето што и се доставува на Украина, признавајќи дека напорите за снабдување на Киев со оружје се попречени поради доцнењата.
Бербок истакна дека Украина нема да има корист од ветувањата за испорака на оружје што останува неисполнето, или од пратките со неисправна воена опрема. „Некои од нашите системи се навистина старомодни… и на почетокот рековме дека некои не функционираат“, рече таа, објаснувајќи дека тоа се должи на фактот што Германија многу децении не била вклучена во голема војна.
„Кога испорачуваме нешто, тоа мора да работи на теренот“, нагласи таа, додавајќи дека тоа е причината зошто Германија не и обезбеди на Украина ракети „Таурус“ со долг дострел, кои таа ги опиша како исклучително софистицирани.
„Ова е најновото нешто што го имаме, така што треба да бидеме јасни за секој детал, како функционира, кој всушност може да управува со тоа. Да, потребно е одредено време… но штом ќе го испорачаме, мора да работи“, истакна таа, додавајќи дека истите размислувања важат и за некои други оружја од германско производство.
Украинците веќе неколку месеци бараат ракети Таурус кои имаат дострел од околу 500 километри и можат да носат боева глава од 500 килограми. Сепак, и покрај извештаите во медиумите дека Берлин ги поставува темелите за испораки, Бербок претходно овој месец предупреди дека испораката нема да дојде во блиска иднина бидејќи „секој детал треба однапред да се разработи“.
Германија, исто така, не сакаше да ги испорача ракетите поради загриженоста дека би можело да се предизвика голема ескалација доколку Киев ги искористи за да нападне длабоко во Русија.
Минатата недела Der Spiegel објави, повикувајќи се на свои извори, дека Украина одбила да прифати десет застарени тенкови Леопард 1 поради нивната лоша механичка состојба. Украинските власти, наводно, им рекле на Германците дека оклопот што пристигнува во Полска треба да се поправи пред да биде распореден на линијата на фронтот, но дека нема ниту персонал за одржување, ниту резервни делови за да го сторат тоа.
