Светки во козметиката и различните сјаеви треба да заминат во историјата по одлуката на Европската комисија (ЕК) да ја ограничи употребата на микропластиката што намерно се додава во производите, поради што трговците со козметика подготвуваат промотивна продажба на такви производи.
На 25 септември, ЕК усвои мерка со која, во согласност со законодавството на ЕУ за хемикалии (регулатива REACH), се ограничува микропластиката што намерно се додава на производите. Оваа мерка не се однесува само на козметичката индустрија, туку има и пошироки импликации.
Новите мерки ќе спречат испуштање на околу половина милион тони микропластика во животната средина. Ќе биде забранета продажбата на самата микропластика и производите во кои тие намерно се додадени. За оправдани случаи ќе се применуваат отстапувања и преодни периоди, за да можат субјектите за кои важат новите правила да се прилагодат.
Применета е широка дефиниција за микропластика – ги вклучува сите честички од синтетички полимери кои се со големина помала од пет милиметри, а се органски, нерастворливи и отпорни на распаѓање. Целта е да се намалат емисиите на намерно додадена микропластика од што е можно повеќе производи.
