Главниот град на Малта, Валета, е во опасност да го загуби статусот на светско наследство на УНЕСКО поради непостапувањето на владата, а особено на Министерството за култура, во спроведувањето на препораките на агенцијата на Обединетите нации, од кои некои датираат повеќе од декада.
Валета беше ставена на листата на светско наследство на УНЕСКО во 1980 година, но преголемиот развој во последниве години и немањето на соодветни владини дејствија го ставаат тој статус во ризик, објави Еурактив.
Врз основа на одлуката донесена минатиот месец за време на последната Конвенција за светско наследство на УНЕСКО во Ријад, Саудиска Арабија, Малта доби рок до крајот на 2024 година да претстави ажуриран извештај за состојбата на зачувување на Валета, конкретно планот за управување првично побаран во 2011 година.
Во 2017 година, Советодавната мисија на УНЕСКО повторно ја советуваше Малта да го комплетира планот за управување со Валета за да одговори на растечката загриженост за тоа како високите згради влијаат на видливоста и да воведе ограничување за висината на новите згради.
Мисијата, исто така, побара од Малта да изврши проценка на влијанието на наследството за секоја идна голема реставрација или нова градба во Валета и итно да назначи управител на локацијата.
УНЕСКО, исто така, изрази загриженост поради неодамнешните извештаи за долго одложуваното реновирање на музејот во катедралата Свети Јован и развојот на островот Маноел.
