Руската Федерална служба за ветеринарна и фитосанитарна контрола Роселхознадзор воведе привремени ограничувања за увоз на риба и морски плодови од Јапонија поради испуштање на прочистена радиоактивна вода од нуклеарната централа Фукушима.
„Роселхознадзор се приклучува кон привремените рестриктивни мерки на Народна Република Кина во однос на увозот на риба и морски плодови од Јапонија од 16 октомври како мерка на претпазливост“, се вели во соопштението.
Мерките ќе важат додека не се обезбедат „сеопфатни информации неопходни за потврда на безбедноста“, во согласност со барањата на Евроазиската економска унија.
Во август, Токио почна да ја исфрла во океанот водата акумулирана како резултат на ладењето на реакторот за итни случаи во нуклеарната централа Фукушима, каде што се случи нуклеарна катастрофа во 2011 година, процес кој ќе трае 30 години.
Меѓународната агенција за атомска енергија (МААЕ) соопшти дека ослободувањето е целосно во согласност со меѓународните стандарди, но Кина, главниот увозник на јапонската морска храна, воведе целосна забрана за увоз и преработка.
