Работниците на Амазон ги открија плановите за одржување штрајкови и протести на „црниот петок“ во повеќе од 30 земји, вклучително и во Велика Британија.
Штрајкот на „црниот петок“, кој е ден на акции и попусти, кој ќе се одржи на 24 ноември, беше најавен во Манчестер на првиот самит на синдикалци и политички лидери на движењето “Направи Амазон да плати“, објави Гардиан.
Во четвртокот онлајн трговецот на мало откри дека неговиот профит се зголемил тројно.
Американскиот сенатор Берни Сандерс присуствуваше во Манчестер заедно со вториот вицепремиер на Шпанија, Јоланда Дијаз и генералниот секретар на Конгресот на синдикатите, Пол Новак, охрабрувајќи ги работниците на Амазон „да се приклучат на глобалната борба за своите права“.
Сандерс на самитот рече: „Ниту една компанија не е подобар пример од Амазон за корпоративна алчност и ароганција што ги гледаме во САД, Велика Британија и во целиот свет“.
Тој го истакна богатството од 143 милијарди долари на основачот на Амазон, Џеф Безос, третиот најбогат човек во светот, тврдејќи дека ако „може да си ги дозволи сите тие куќи и сите тие јахти и сите тие ракетни бродови, може да си дозволи работниците во Амазон да добијат синдикален договор кој е фер и праведен“.
Минатата година, коалицијата организираше повеќе од 135 штрајкови и протести низ 35 земји на „црниот петок“. Портпаролот на групата за кампања Прогресив Интернационал, еден од организаторите на настанот, рече дека годинешниот ден на акција ќе биде уште поголем во однос на влијанието.
Синдикатот рече дека компанијата „мора итно да ги преиспита своите приоритети“, осудувајќи го планираното зголемување на платите за работниците во Британија, објавено оваа недела како „малку утеха за илјадниците работници на Амазон кои се соочуваат со сиромаштија, мизерни плати и надзор на работното место“.
Дијаз изјави на самитот: „Клучно е да го кренеме нашиот глас и да бараме големите компании да ги почитуваат заедниците каде работат нивните работници, дека тие го плаќаат својот фер дел и дека тие поефикасно придонесуваат за примарниот предизвик со кој се соочува човештвото денес, климатската вонредна состојба“.
Портпаролот на Амазон рече: „Секогаш се стремиме да бидеме подобри и иако знаеме дека имаме повеќе работа, горди сме на напредокот што го постигнавме.
„Отворивме милиони добри работни места, истовремено помагајќи во создавањето и поддршката на стотици илјади мали бизниси ширум светот. Нудиме големи плати и бенефиции и обезбедуваме модерна и безбедна работна средина во која секој е добредојден“.
„Продолжуваме да инвестираме во земјите и заедниците каде што работиме и горди сме што сме најголемиот корпоративен купувач на обновлива енергија во светот.
