Францускиот претседател Емануел Макрон повика денеска, по самитот на ЕУ во Брисел, да се воспостави хуманитарно примирје во Појасот Газа, додавајќи дека израелските сили треба попрецизно да ги таргетираат терористите на Хамас за време на воздушните напади.
„Целосно ја признаваме вистинската и легитимна желба за борба против тероризмот. Подготвени сме да помогнеме, но веруваме дека целосна блокада, неселективно бомбардирање и копнена операција веројатно нема соодветно да го заштитат цивилното население“, рече Макрон, пренесува Фигаро.
Тој изјави дека неколку европски земји сакаат да градат коалиции за испорака на хуманитарна помош во Појасот Газа.
Тој додаде дека во овој поглед се водат разговори со Кипар и Грција и дека Кипар може да биде база за хуманитарни операции за Газа.
Зборувајќи за средбата меѓу рускиот претседател Владимир Путин и унгарскиот премиер Виктор Орбан, Макрон рече дека средбата „не го шокирала“, додавајќи дека таа не треба да ја ослабне поддршката на Европската унија за Украина.
„Не можеме да му забраниме на шефот на државата или владата да се види со овој или оној лидер“, рече францускиот претседател.
Во Брисел денеска заврши дводневниот самит на Европскиот совет на кој се разговараше за Украина, конфликтот меѓу Израел и Хамас и дијалогот меѓу Белград и Приштина.
Во четвртокот, на првиот ден од самитот, лидерите на ЕУ усвоија декларација во која повикаа на „паузи“ во непријателствата меѓу Израел и Хамас и побараа отворање на хуманитарни коридори, за да може итно потребната помош да се достави до Појасот Газа. .
