Францускиот претседател Емануел Макрон денеска изјави дека неговата земја ќе испрати уште 80 милиони евра во Газа.
„Од 7 октомври Франција најави 20 милиони евра дополнителна хуманитарна помош. Имаме намера да додадеме уште 80 милиони евра хуманитарна помош“, рече францускиот претседател на Меѓународната хуманитарна конференција за Газа што се одржува во Париз, чија цел е да ја деблокира испораката на хуманитарна помош, но без многу надеж за напредок бидејќи на конференцијата нема претставници на израелската влада, ниту лидерите на арапските држави.
– Мораме да работиме на заштита на цивилите. За ова е неопходно многу брзо да се прогласат хуманитарни паузи и мора да работиме на прекин на огнот, рече Макрон пред претставници на педесетина земји и хуманитарни организации.
Додека Израел „има право да се брани себеси и должност да го заштити своето“, нивната влада исто така има „важна должност … да го почитува законот и да ги штити цивилите“, рече тој. – Борбата против тероризмот никогаш не може да се води без правила, додаде Макрон, нагласувајќи дека хуманитарната ситуација се влошува „секој ден се повеќе“.
За конференцијата во париз била информирана израелската влада, но одлучила да не испрати претставници. – Знаеме дека ситуацијата со цивилите во Појасот Газа не е лесна, изјави денеска полковникот Моше Тетро, кој е одговорен за Газа во телото на Министерството за одбрана што ги надгледува цивилните активности на палестинските територии, негирајќи дека има хуманитарен криза.
Хуманитарните организации, силно застапени во Париз, едногласно ја критикуваа неможноста да се достави помош за Појасот Газа.
– Не можеме да чекаме ниту минута повеќе за хуманитарен прекин на огнот во Газа и укинување на опсадата што е колективна казна за еден милион деца, рече Јан Егеланд, генерален секретар на Норвешкиот совет за бегалци (НРЦ). „Законот се крши пред нашите очи од двете страни.
ОН проценија дека на населението на Газа и на Западниот Брег му требаат 1,2 милијарди американски долари помош до крајот на годината.
– Она што го прави израелската влада го надминува правото на самоодбрана, рече египетскиот министер за надворешни работи Самех Шукри во Париз.
– Колку Палестинци мора да бидат убиени за да се запре војната? Дали е доволно убиството на шест деца и четири жени на час? праша палестинскиот премиер Мохамад Штајех, барајќи „да се стави крај на двојните стандарди“.
„ОН никогаш не забележале толку многу загинати за толку кратко време во конфликт“, изјави денеска Филип Лазарини, директор на агенцијата на ОН за палестински бегалци (УНРВА), додавајќи дека речиси стотина лица од персоналот на неговата агенција се убиени.
Елисејската палата соопшти дека конференцијата нема да заврши со заедничка декларација за да се избегне бескрајна дебата за секој збор.
