Вршителот на должноста шпански премиер Педро Санчез денес потпиша договор со мала баскиска партија што му обезбедува доволно парламентарна поддршка за да биде реизбран, можеби следната недела.
Договорот меѓу Социјалистичката партија на Санчез и Баскиската националистичка партија значи дека Санчез ќе може да смета на поддршката од 178 пратеници, два повеќе од мнозинството што му треба во 350-члениот Парламент за да биде избран за следен премиер. Санчез е на функцијата од 2018 година.
Во четвртокот, социјалистите ја добија поддршката во Парламентот на екстремната каталонска сепаратистичка партија предводена од пребегнатиот поранешен каталонски претседател Карлес Пуџдемон во замена за амнестија за потенцијално илјадници луѓе вклучени во неуспешниот обид за отцепување на регионот.
Деталите за нацрт-законот за амнестија допрва треба да се објават, но тој треба да биде од корист за Пуџдемон и голем број други, од помали владини функционери до обични граѓани, кои наидоа на правни проблеми поради нивните улоги во нелегалниот обид за отцепување на Каталонија што ја доведе Шпанија на работ на распад пред шест години.
Шпанските судови сè уште се обидуваат Пуџдемон да биде екстрадиран од Белгија. Со оглед на тоа дека за многу Шпанци се смета за државен непријател, секоја зделка што му користи е политички токсична.
Амнестијата го зголеми гневот на двете главни опозициски партии во Шпанија, Десничарската Народна партија и екстремно десничарската група Вокс. Тоа, исто така, предизвика незадоволство во судството и полициските синдикати.
Десетици илјади луѓе се собраа во Мадрид и Барселона против амнестијата во последните недели.
Насилството изби во четвртокот доцна навечер пред седиштето на Социјалистичката партија по четири последователни ноќи на протести. На силниот полициски кордон беа фрлени шишиња, лименки пиво и огномети, а полицајците влегоа со палки за да ги разбијат протестите и да извршат апсења. Повеќе протести беа најавени за дебес и за време на викендот.
Санчез, кој порано се спротивстави на амнестијата, инсистира дека сега е потребна за враќање на нормалниот политички живот во Каталонија и дека тоа ќе биде од корист за Шпанија.
