„Moody’s Investors Service“ во петокот ја намали прогнозата за рејтингот на владата на Соединетите Држави на негативен од стабилен, укажувајќи на зголемените ризици за фискалната сила на нацијата.
„Во контекст на повисоки каматни стапки, без ефективни мерки на фискалната политика за намалување на државните трошоци или зголемување на приходите Мудис очекува дека фискалните дефицити на САД ќе останат многу големи, што значително ќе ја ослабне достапноста на долгот“, наведоа од агенцијата.
Оттаму додадоа дека континуираната политичка поларизација во американскиот Конгрес го зголемува ризикот следните влади да не можат да постигнат консензус за фискален план за забавување на падот на достапноста на долгот, соопшти агенцијата за рејтинг.
Што се однесува до одржувањето на рејтингот на нацијата на Ааа, Мудис рече дека очекува САД да ја „задржи својата исклучителна економска сила“. „Понатамошните позитивни изненадувања за раст на среден рок би можеле барем да го забават влошувањето на достапноста на долгот“, велат од агенцијата.
„Иако изјавата на Мудис го одржува рејтингот Ааа на Соединетите држави, ние не се согласуваме со промената кон негативна перспектива“, рече заменик-секретарот на Министерството за финансии, Воли Адејемо во изјавата. „Американската економија останува силна, а државните хартии од вредност се најистакнатите безбедни и ликвидни средства во светот.
Потегот на Мудис да ја намали својата перспектива доаѓа кога Конгресот се соочува со закана од затворање на владата уште еднаш. Засега владата се финансира до 17.ти ноември, но пратениците во Вашингтон остануваат во расправија околу нацрт-законот пред крајниот рок.
Новоизбраниот претседател на Претставничкиот дом, Мајк Џонсон, посочи дека ќе го објави планот за финансирање на републиканската влада во сабота, потег што ќе им овозможи на членовите да имаат време да го прочитаат пред очекуваното гласање во вторник за мерката.
Уште во август, Фич го намали долгорочниот рејтинг на САД за неисполнување на обврските на издавачот на странска валута на АА+ од ААА, наведувајќи го „очекуваното фискално влошување во следните три години“, како и ерозија на управувањето и растечкиот должнички товар.
