Лекарите без граници повикаа на итен прекин на огнот и рекоа дека „нападите врз болниците мора да престанат“ по немилосрдните напади врз медицинските центри во Газа.
„Не престануваат непријателствата околу болницата“, се вели во соопштението на добротворната организација.
Во моментов има тимови вработени во болничкиот комплекс Ал-Шифа, една од нападнатите болници. Се наведува дека биле погодени одделенијата за породилно и амбулантско, што резултирало со повеќе смртни случаи и повредени.
„Тука нѐ убиваат, те молам направи нешто“, напиша една медицинска сестра додека се криеше во подрумот на болницата со своето семејство, велат од добротворната организација. „Четири или пет семејства сега се засолнуваат во подрумот, гранатирањето е толку блиску, моите деца плачат и врескаат од страв“.
Лекари без граници ја осудија, како што рекоа, „смртна пресуда за цивилите кои моментално се заробени во болницата Ал-Шифа, потпишана од израелската војска“.
„Треба да има итен и безусловен прекин на огнот меѓу сите завојувани страни. Хуманитарната помош мора да се достави до целата Газа сега“, соопшти добротворната организација.
