Во Унгарија утрово осамнаа билборди поставени од владеачката партија на премиерот Виктор Орбан со кои се критикува претседателката на Европската комисија Урсула Фон дер Лајен, што е првпат да ја направи лична мета во кампања слична на онаа против нејзиниот претходник Жан-Клод Јункер, која го налути Брисел.
Во текот на ноќта, на кампањските плакати за европските парламентарни избори во јуни следната година се гледа Фон дер Лајен заедно со Алекс Сорос, син на либералниот милијардер инвеститор со унгарско потекло Џорџ Сорос, долгогодишна цел на непријателство од партијата Фидес на Орбан.
Слоганот е: „Не играјте како што ви свират тие“. Сорос е Евреин и некои критичари сметаат дека централната улога што тој ја игра во пропагандата на Фидес е доказ за антисемитизам. Фидес категорично го негира. Слични билборди на кои беше прикажан Јункер заедно со постариот Сорос (Џорџ Сорос) предизвикаа прекор од Брисел во 2019 година.
Фидес ги отстрани тие билборди откако најсилната централнодесничарска група во Европскиот парламент (ЕПП) се закани со исклучување на унгарската партија. Фидес ја напушти ЕПП две години подоцна.
Орбан, чија влада се обидува да деблокира милијарди евра од фондовите на ЕУ суспендирани од Брисел поради политиката на Фидес, во саботата рече дека Унгарија „мора да каже не на сегашниот европски модел изграден во Брисел“.
Унгарија се очекува да биде во центарот на вниманието на следниот самит на ЕУ во средината на декември, бидејќи земјата на ЕУ која е најмногу наклонета кон Русија и скептична кон плановите за приклучување на Украина во ЕУ што се очекува да биде главна тема на самитот.
