Речиси два месеци по војната меѓу Израел и Хамас, протестите насочени против некои компании кои се прикажани како произраелски продолжуваат да се зголемуваат со повици на социјалните медиуми за нивен бојкот.
Тие повици генерално се фокусирани на две компании: Мекдоналдс и Старбакс. Иако секоја од компаниите се обиде да се дистанцира од конфликтот и издаде изјави дека не ја поддржуваат или донираат за владата или војската на Израел, тоа не направи многу за да ги смири повиците за бојкот преку Интернет, пишува НБЦ њуз.
Податоците објавени од TikTok покажуваат дека употребата на хаштагот „#boycottstarbucks“ достигна врв на почетокот на ноември, но и понатаму се зголемува. Користена е на 7.000 видеа на TikTok во САД во изминатите 30 дена, со вкупно 51 милион прегледи. Хаштагот „#boycottmcdonalds“ следеше слична патека, користена на повеќе од 3.000 видеа на TikTok со 10 милиони прегледи во истиот период. Има и многу видеа за бојкотите кои не користат хаштагови.
Популарниот рефрен за бојкот на „Старбакс“ и „Мекдоналдс“ настана на интернет, почнувајќи брзо по самиот конфликт.
Повиците за бојкот на Старбакс започнале откако компанијата го тужела Starbucks Workers United (SWU), синдикат со повеќе од 360 продавници и повеќе од 9.000 вработени, поради објавата на нивната X сметка на која пишувало „Солидарност со Палестина“ по нападот на Хамас на 7. октомври.
Бојкотите на Мекдоналдс, пак, биле предизвикани од новинските извештаи дека сопственик на франшиза во Израел рекол дека неговите ресторани ќе обезбедуваат бесплатни оброци за војниците на израелските одбранбени сили и израелските болници. Newsweek објави дека од израелската франшиза изјавиле дека пет продавници работат само за оваа намена, а донирани се повеќе од 100.000 оброци.
Мекдоналдс се обиде да се дистанцира од таа франшиза.
„Корпорацијата Мекдоналдс не финансира ниту поддржува влади кои се вклучени во овој конфликт, а сите дејствија од нашите локални деловни партнери со лиценца за развој беа направени независно без согласност или одобрение од Мекдоналдс“, се продолжува во соопштението.
Оттогаш, повиците за бојкот преку Интернет продолжија и со некои протести на терен. Виралните видеа наводно покажуваат демонстранти како се собираат пред продавниците на Мекдоналдс во Либан и Турција, како и пред Мекдоналдс во Мелбурн, Австралија. Во средината на октомври, „#BoycottMcDonalds“ стана тренд на X. Истиот месец, десетици студенти од Универзитетот Хауард се собраа пред Старбакс во Вашингтон, за да напишат пропалестински пораки со креда на тротоарите.
