Есенските врнежливи денови, покрај другото, причинуваат влажни коловози и отежнато движење на возилата, особено на високите планинските патишта во Полог, кон Стража и Маврово и пред сè по долината на Радика, најчесто доцна навечер и во раните утрински часови. Доколку во наредните денови позначително се спуштат температурите, како што најавуваат синоптичарите, на овие патишта можна е појава и на голомразица, како и одрони од земја и камења предупредува Марјан Јосифоски, портпарол на СВР Тетово.
Секторот за внатрешни работи Тетово апелира до возачите да бидат крајно внимателни ако патуваат кон Стража, Маврово или Попова Шапка и задолжително да поседуваат зимска опрема, да ја прилагодат брзината според условите на патот.
– На возачите им се советува навреме да ја проверат техничката исправност на нивните возила и посебно оние кои вршат јавен превоз на патници со автобуси и комбиња, да не консумираат алкохол кога седнуваат зад волан и да не управуваат неподготвени и заморени. Полициските службеници на Секторот за внатрешни работи Тетово континуирано спроведуваат и во наредниот период ќе продолжат со засилени контролни активности, во чие средиште ќе биде техничката исправност, како и брзината со која се движат во и надвор од населените места, се вели во апелот.
Техничките неисправните возила ќе се исклучуваат од сообраќај и ќе следуваат соодветни поднесоци, како и за пребрзите и возачите кои ги управуваат возилата под дејство на алкохол.
