Поранешниот министер за здравство, д-р Венко Филипче, денеска на Клиниката за неврохирургија заедно со неговиот тим успешно направија операција на мозок на свесен пациент. Докторот веста ја сподели на социјалните мрежи.
„За прв пат во историјата на неврохирургијата во нашата држава, направивме операција на мозок на свесен пациент. Операцијата ја изведовме кај млада пациентка која имаше тумор блиску до центрите за говор и движење на десната рака и нога. Предноста на ваквата процедура е поради неопходната соработка која хирургот ја има со пациентот додека трае операцијата. За да се отстрани максимална количина на тумор без да се оштетат центрите за говор и движење хирургот комуницира со пациентот. Мозочното ткиво не содржи рецептори за болка, па самиот тек на операцијата е безболен. Кај нашата млада пациентка операцијата помина одлично. Туморот е изваден до максималните можни граници и пациентката се осеќа добро. Им честитам на тимот анестезиолози предводен од д-р Весна Дурнев и упатувам благодарност до колегата д-р Игор Лазиќ од Клиниката за неврохирургија во Белград. Драго ми е што моите млади колеги имаа голем интерес и желба да бидат повторно мој верен тим во операционата сала“, соопшти Венко Филипче.
