Синдромот на празнично срце можеби на почетокот звучи како термин од романтични филмови, но тоа е опасна појава која станува се почеста во овој период од годината.
Д-р Мајкл Чејн од Мериленд, истакнува дека синдромот на празнично срце првпат бил опишан во 1978 година кога била воспоставена врската помеѓу пиењето и срцевите аритмии. Студијата заклучила дека овој синдром се јавува кај луѓе кои досега не страдале од проблеми со срцето и тоа е она што е најстрашно во оваа појава.
-Очигледно во овој период од годината има многу повеќе забави, дружење и луѓето повеќе пијат – вели Чејн. Ова може да доведе до прекумерно пиење, што дополнително може да предизвика срцеви аритмии, пишува vtop.com.
Лекарите го дефинираат прекумерното пиење како консумирање пет или повеќе пијалоци истовремено за мажи и четири или повеќе пијалоци за жени. Атријалната фибрилација, рече Чејн, е вид на неправилен срцев ритам.
-Она што пациентите можат да го почувствуваат е палпитации, чувството дека срцето ви е надвор од ритам, прескокнување, што е сериозна причина за загриженост, бидејќи може да доведе до мозочен удар. Алкохолот не е единствениот виновник што придонесува за срцеви аритмии за време на празниците. Поголеми дози на кофеин и поголем внес на сол со нездравата храна и грицки, исто така, може да предизвикаат стрес врз срцето, што може да придонесе за атријална фибрилација, рече Чејн.
Ако почувствувате вртоглавица или зашеметеност што може да дојде со аритмија, или ненадејна епизода кога имате проблеми со зборувањето или почувствувате ненадејна слабост на едната страна, важно е да побарате медицинска помош.
Американската асоцијација за срце објави студија во која се наведува дека повеќе срцеви смртни случаи се случуваат во САД на 25 декември отколку кој било друг ден од годината, што делумно го припишуваат на синдромот на празнично срце.
