Одборот за надворешна политика на турскиот парламент денеска ја одобри кандидатурата на Шведска за членство во НАТО, што е клучен чекор кон проширување на Алијансата, по 19 месеци одложувања во кои Анкара бараше отстапки од Стокхолм.
Следниот чекор ќе биде гласање за кандидатурата на Шведска во парламентот за неколку недели кога се очекува турските пратеници да го поддржат предлогот.
Потоа се очекува турскиот претседател Реџеп Таип Ердоган да го потпише законот за да стапи во сила.
Шведска и Финска аплицираа за членство во НАТО минатата година, а Анкара само го ратификуваше барањето на Финска.
Ердоган во декември предложи парламентот да го одобри барањето на Шведска само ако американскиот Конгрес и дозволи на Турција да купи десетици борбени авиони Ф-16 и резервни делови и ако другите сојузници на НАТО, вклучително и Канада, го укинат ембаргото за оружје за Анкара.
