Многу луѓе речиси 24 часа останаа заглавени во илјада возила поради снежните наноси на главниот шведски пат Е22, а им помогна и војската која им носеше храна и вода.
Многумина беа извлечени од нивните возила и им беше кажано да се вратат по нив подоцна. Тешкотиите на патот Е22 започнаа вчера во 9 часот по локално време, кога снегот го направи овој пат непрооден во двата правци во делот меѓу градовите Хорби и Кристијанштад.
Портпаролката на полицијата Евелина Олсон изјави дека владее тотален хаос. Според неа, проблемот е што снегот паднал толку многу што по половина час чистење, патот повторно бил затрупан со снег.
Работеле цела ноќ за да спасат луѓе, а некои од нив имале и здравствени проблеми. Меѓу спасените е и Ерика Сепелиоваите, која за порталот Афтонбладет изјавила дека таа, нејзините две деца и нивното куче биле спасени по 19 часот. Малин Јохансон рече дека таа и нејзиниот партнер повремено го палат автомобилот за да го загреат.
Автомобилскиот сообраќај беше дозволен денеска во утринските часови, додека камионите се уште се заглавени. Полицијата најави дека условите се подобруваат, но дека патот Е22 нема да биде расчистен најрано до петок во 8 часот. Автобуските и железничките услуги утрово беа прекинати во регионот Скане, кој се наоѓа на југот на Шведска. Надлежните повикаа да се избегнува патување доколку тоа не е потребно.
Сообраќаен хаос настана поради крајно неповолните временски услови низ нордиските земји. Времето е екстремно студено во Шведска, Финска и Норвешка, а поради снежните наноси вчера беа заглавени и возачи на автопатот кај данскиот град Архус.
