Извршната директорка на стартап со вештачка интелигенција во Индија е уапсена под сомнение дека го убила својот 4-годишен син, чие тело било пронајдено ставено во нејзиниот куфер, соопштија властите.
Сушана Сет (39), извршен директор на The Mindful AI Lab од Бенгалуру, беше уапсена во понеделникот во државата Карнатака додека се враќала дома од патување во државата Гоа, соопшти полицијата.
Во саботата, Сет и нејзиниот син се пријавиле во хотел во Гоа. Кога се одјавила во понеделникот наутро, момчето не било со неа.
Таа побарала такси за да ја врати назад во Бенгалуру, според ЦБС њуз.
Откако се одјавила, персоналот на хотелот наводно пронашол крв на подот од нејзината соба и ја известил полицијата, изјави за новинарите во понеделникот Нидин Валсан, началник на полицијата во државата Гоа. Полицијата му влегла во трага на таксистот и му рекла да ја однесе Сет до најблиската полициска станица.
Началникот на полицијата во Читрадурга изјавил дека телото на момчето било во куферот во багажникот на таксито, пишува Тајмс оф Индија. Возачот рекол дека Сет изгледала смирено и дека не се сомневал дека ништо не е во ред додека полицијата не го повикала и не му кажала да вози до најблиската полициска станица.
„Кога беше отворен нејзиниот багаж, беше пронајдено мртвото тело на детето“, им рече Валсан на новинарите.
„Детето беше угушено“, изјави за новинарите д-р Кумар Наик, административен службеник во болницата Хиријур Талук во Читрадурга.
„Се користела или крпа или перница“, додал тој.
Сет била одвоена од нејзиниот сопруг и била во битка за старателство со него во моментот на смртта на нејзиниот син, соопшти полицијата.
Сметката на Сет на Линкедин ја опишува како „експерт за етика на вештачка интелигенција и научник за податоци со над 12 години искуство во менторство на тимови за наука за податоци и скалирање на решенија за машинско учење во стартапи и лаборатории за истражување на индустријата“.
