Трошоците на европските пржилници за кафе нагло пораснаа поради кризата во Црвеното Море и ги принудија да бараат нови извори на оваа стока, предупредуваат трговците и аналитичарите од секторот за кафе.
Цените на товарот за контејнери на линијата Азија-Европа скокнаа за околу 150 отсто. Бродовите со зрна кафе од Виетнам и Индонезија го заобиколуваат Црвеното Море, кое е цел на јеменските Хути, и патуваат околу Ртот на добра надеж, поради што стоката пристигнува во Европа околу три недели подоцна.
Затоа, пржилници се принудени да бараат други производители, вклучувајќи ги Бразил и Уганда.
Брокерите велат дека тоа предизвикало раст на големопродажните цени, што значи повисоки трошоци за печењата.
-Гледаме пад на новите нарачки (од Европа) бидејќи клиентите имаат поголеми трошоци за испорака. Многу сме загрижени. Во овој период од годината извозот на кафе обично го достигнува својот врв – изјави извршниот директор на еден од најголемите виетнамски извозници на кафе, кој сакаше да остане анонимен.
Тој забележува дека околу 60 отсто од кафето од Виетнам оди во Европа.
Проблемите со недостигот на контејнери само ќе се интензивираат и ќе достигнат размери слични на оние во екот на пандемијата на Ковид-19, предупредуваат трговците.
