Државниот секретар Антони Блинкен во средата го зголеми притисокот врз Бенјамин Нетанјаху во врска со иднината на Појасот Газа, откривајќи ги растечките фрустрации на администрацијата на Бајден поради отфрлањето на предлогот од страна на израелскиот премиер минатата недела, пишува НБЦ њуз.
„Постои длабока можност за регионализација на Блискиот Исток, на поголемиот Блиски Исток, каква што досега не сме имале“, рече Блинкен за време на интервјуто на самитот на Светскиот економски форум во Давос, Швајцарија.
На прашањето дали Нетанјаху е премиер што ја искористи оваа можност, Блинкен рече: „Ова се одлуки што треба да ги донесат Израелците“, додавајќи: „Ова е точка на свртување“.
Коментарите на Блинкен, дадени за време на интервјуто со колумнистот на Њујорк Тајмс, Том Фридман, доаѓаат само една недела по патувањето на Блискиот Исток во обид да ги натера Израел и арапските лидери да се договорат за патот напред за Газа штом ќе заврши војната со Хамас.
Поделбите на администрацијата на Бајден и Нетанјаху околу начинот на кој Израел се справува со војната со Хамас, како и одбивањето на израелскиот лидер да ги разгледа предлозите на САД за повоена Газа, станаа поизразени по посетата на Блинкен на Израел, според повеќе високи претставници на администрацијата.
Државниот секретар се врати во Вашингтон, рекоа официјалните лица, откако Нетанјаху го одби сите барања на администрацијата освен едно: согласност дека Израел нема да го нападне Хезболах во Либан.
Главното достигнување на Блинкен на патувањето беше преземањето обврска од саудискиот престолонаследник Мохамед бин Салман и четворица други арапски лидери да помогнат во обновата на Газа по војната, изјавија повеќе високи претставници на администрацијата. Арапските лидери, исто така, се согласија да поддржат нова, реформирана палестинска влада за обезбедување на Газа, рекоа официјалните лица. Саудискиот престолонаследник понуди нормализирање на односите со Израел како дел од договорот за обнова на Газа – дипломатски развој што Нетанјаху долго го бараше – но само ако израелскиот лидер се согласи да им обезбеди на Палестинците пат кон државност, рекоа официјалните лица.
Блинкен му рекол на Нетанјаху дека на крајот нема воено решение за Хамас, според официјалните лица, и дека израелскиот лидер треба да го признае тоа или историјата ќе се повтори и насилството ќе продолжи. Но, рекоа официјалните лица, Нетанјаху беше непоколеблив.
Во интервјуто за CNBC во вторникот на Светскиот економски форум, Блинкен рече дека за да се случи нормализацијата на Саудиска Арабија со Израел, „треба да се реши палестинското прашање“.
„Арапските земји велат… ние нема да се впуштиме во бизнисот, на пример, со обнова на Газа, само за да се срамни повторно за една или пет години, а потоа повторно да бидеме замолени да ја обновиме“, кажа тој.
Бајден постојано ја нагласуваше посветеноста на САД за евентуална палестинска држава, таканареченото решение за две држави што произлегува од историскиот договор од Кемп Дејвид во 1978 година меѓу Израел и Египет, вграден во резолуциите на Обединетите нации и подоцна прифатен од Израел и Палестинците во 1993 година. Нетанјаху направи решение за две држави сè потешко да се постигне за време на неговиот мандат. И од терористичкиот напад на Хамас на 7 октомври, израелскиот лидер категорично отфрли каква било идна држава за Палестинците, дури и минатиот месец рече: „Горд сум што спречив формирање на палестинска држава“.
Бајден целосно ја поддржува војната на Израел против Хамас од 7 октомври, но се повеќе изразува загриженост за тоа како Нетанјаху ја спроведува.
Тензиите меѓу двајцата лидери се очигледни во нивниот недостаток на директна комуникација во последните недели. Во првите два месеци од војната, Бајден редовно разговараше со Нетанјаху. Но, како што растеше фрустрацијата на администрацијата од масовната употреба на сила од страна на Израел и одбивањето на очајно потребните испораки за Газа, нивните разговори станаа поретки, според официјални претставници на администрацијата. Нивниот последен познат повик беше на 23 декември, пред повеќе од три недели. Според американските власти, тој повик ненадејно завршил со несогласување околу одбивањето на Израел да префрли стотици милиони долари од даночните приходи што ги задржува на палестинската управа од почетокот на војната.
Високиот биланс на загинати цивили, кој сега достигнува 24.000, според палестинското Министерство за здравство, управувано од Хамас, е уште една причина за триење, како и несогласувања околу запирање на испораката на помош во Газа. САД се соочија со меѓународен притисок да направат повеќе за да го натераат Израел да дозволи повеќе испораки на храна и помош во Газа. Блинкен на средбата со Нетанјаху го притисна по ова прашање.
Но, потоа, Нетанјаху упати необичен јавен укор за барањата на Блинкен во телевизиско обраќање. „Продолжуваме со полна сила“ додека Хамас не ги ослободи сите свои заложници, рече Нетанјаху.
