Центарот за обука на Обединетите нации во кој засолниште најдоа десетици илјади раселени лица е погоден, што доведе до „масовни жртви“ и пожари во згради, изјави висок претставник на ОН, додека израелските сили напредуваат низ Кан Јунис, клучен град на југот на Појасот Газа.
Во нападот врз Кан Јунис, израелските сили исто така го блокираа пристапот до главните болници на југот на енклавата и ја затворија главната рута за евакуација за стотици илјади жители и луѓе кои побараа засолниште таму, изјавија палестинските власти. На прашањето за пожарот во центарот управуван од УНРВА, главната агенција на ОН во Газа, израелската војска рече дека пошироката област таму е важна база за милитантите на Хамас.
„Кршењето на воената рамка на Хамас во западниот дел од Кан Јунис е централната идеја зад операцијата“, објасни армијата.
Како дел од најголемата операција во последниот месец, израелските тенкови навлегоа низ Кан Јунис, каде стотици илјади раселени Палестинци се засолниле откако го напуштиле северниот дел на енклавата, главната сцена на конфликт на почетокот на војната. Главна цел на израелските сили се чини дека е областа околу бегалскиот камп Кан Јунис, кој ги вклучува болниците Насер и Ал-Амал и центар за обука управуван од УНРВА.
„Борбите ескалираа во Кан Јунис… само што е погоден центарот за обука на УНРВА каде се засолниле 10 илјади раселени лица, зградите горат, а жртвите се огромни, безбедниот пристап до центарот е блокиран веќе два дена, луѓето се заробени. “, рече шефот на УНРВА во Газа Томас Вајт на социјалната платформа Х.
Тој подоцна рече дека девет Палестинци биле убиени, а 75 ранети во израелски напад врз центар за обука и дека два тенковски проектили погодиле зграда означена како засолниште во која биле сместени околу 800 луѓе.
Портпаролот на Министерството за здравство во Газа, Ашраф Ал-Кидра, во изјавата рече: „Окупацијата ги изолира болниците во Кан Јунис и врши масакри во западната област на градот. Поради блокираниот пристап до Насер Медицинскиот комплекс, на стотици повредени, пациенти и пораѓања им се закануваат сериозни компликации“.
Палестинскиот Црвен крст, кој раководи со болницата Ал-Амал, рече дека војниците го блокирале болничкиот персонал и воведоа полициски час, вклучувајќи го и седиштето на организацијата, каде што загинаа тројца раселени лица. Израел тврди дека борците на Хамас оперираат од и околу болниците, што болничките работници и Хамас го негираат.
Во вторникот израелската армија нареди евакуација на областа, во која според Канцеларијата на ОН за хуманитарни прашања живеат половина милион луѓе, од кои четири петтини се раселени поради борбите во другите делови на крајбрежната енклава.
