Моќна бура, поттикната од т.н атмосферската река што дојде од Тихиот океан денеска предизвика поплави низ јужна Калифорнија, предизвикувајќи лизгање на земјиштето, оставајќи многу жители без струја и принудувајќи го, во некои области, населението да бега, јавуваат агенциите.
Околу 1,4 милиони луѓе во областа на Лос Анџелес, вклучувајќи ги Холивуд Хилс и Беверли Хилс, од утрово се под предупредување за поплави. Таму веќе наврнаа околу 23 сантиметри дожд, а метеоролозите предвидуваат повеќе врнежи и сметаат дека заканата од поројни поплави и калливи и карпести одрони се „особено опасна ситуација“.
Вчера во центарот на Лос Анџелес падна 10,41 сантиметар дожд, со што беше соборен рекордот за областа, поставен во 1927 година, кој изнесуваше 6,48 сантиметри, соопшти американската Национална метеоролошка служба.
На северот на Калифорнија, во областа на заливот Сан Франциско, вчера невремето ги претвори улиците во реки, а урна и дрвја и далноводи со ветрови од над 94 километри на час. Во планините, ударите на ветерот беа и до 128 километри на час.
На југ, во Сан Хозе, службите за итни случаи ги извлекоа патниците од нивните автомобили низ прозорците и ги спасија жителите на кампер бездомници покрај надојдената река.
Невремето потоа се префрли на југот на Калифорнија, а наредена е евакуација во кањони кои претходно беа опустошени од пожари и станаа погодни за создавање на лизгање на земјиштето, односно за паѓање на кал и остриги.
Училиштата се затворени во округот Санта Барбара. Во 2018 година, оваа област настрада многу од лизгање на земјиштето.
Низ Калифорнија утрово без струја останаа повеќе од 543.000 корисници.
Во планините Сиера Невада се очекуваат обилни врнежи од снег и на возачите не им се препорачува да патуваат по патиштата таму.
Голем дел од Калифорнија сè уште се опоравуваше од претходниот наплив на невреме што го зафати минатата недела. Најновиот наречен „Ананас експрес“ се протегаше речиси од Хаваите до брегот на северна Калифорнија и таму пристигна во саботата.
Атмосферските реки се релативно тесни облаци од влага кои се формираат над океанот и можат да предизвикаат силен дожд додека минуваат над копното.
Гувернерот Гевин Њусом прогласи вонредна состојба во окрузите Лос Анџелес, Оринџ, Риверсајд, Сан Бернадино, Сан Диего, Сан Луис Обиспо, Санта Барбара и Вентура.
