Товарен брод потона утринава во Мраморното Море, јужно од Истанбул, а шест морнари се водат за исчезнати, соопштија турските власти.
Товарниот брод долг 69 метри, кој превезувал сува стока, испратил сигнал за помош нешто по 6:30 часот по локално време додека бил во близина на брегот на островот Имрали, на околу 50 километри од јужниот брег на Истанбул, соопшти турското Министерство за транспорт.
Според властите, сигналот од бродот под турско знаме престанал да се емитува во 7.12 часот.
Три чамци на турската крајбрежна стража беа испратени во областа, но не можеа да го лоцираат бродот, се вели во соопштението, додавајќи дека во близина е пронајден празен чамец за спасување.
