Претставниците на палестинската милитантна група Хамас денеска ја завршија последната рунда преговори за прекин на огнот во Појасот Газа со египетските претставници во Каиро и сега го чекаат исходот од преговорите меѓу претставниците на Египет и Израел, кои треба да се одржат во текот на викендот во Париз, изјавија неименуван функционер на Хамас и египетски безбедносни извори.
Водачот на Хамас Исмаил Ханије се состана со египетските посредници во Каиро за да разговара за прекин на огнот, во неговата прва посета на Египет од декември.
Повикувајќи се на два неименувани безбедносни извори од Египет, британските медиуми пренесуваат дека шефот на египетската разузнавачка служба Абас Камел денеска ќе отпатува во Париз на разговори со Израелците, откако денеска ќе ги заврши разговорите со Ханије.
Неименуван функционер на Хамас изјави дека за време на разговорите со египетските посредници не дале никаков нов предлог во однос на оние што ги имале претходно, па сега чекаат да видат што ќе кажат претставниците на Израел.
„Разговаравме за нашиот предлог со египетските претставници и ќе почекаме додека не се вратат од Париз“, изјави претставник на Хамас.
Хамас, за кој се уште се верува дека држи повеќе од 100 заложници заробени во нападот на Израел на 7 октомври, што ја предизвика војната во Газа, вели дека ќе ги ослободи само како дел од прекинот на огнот што ќе резултира со повлекување на Израел од Газа.
Од друга страна, Израел наведува дека неговите сили нема да се повлечат додека Хамас не биде искорен.
Двајца палестински функционери наведуваат дека Хамас не го променил ставот, поточно дека се уште бара примирјето да заврши со повлекување на израелската армија.
