Неколку различни криминални мрежи, составени од членови од поранешните југословенски републики Црна Гора, Словенија, Хрватска, Босна и Херцеговина и Србија, се вклучени во голем шверц, вклучително и финансирање и дистрибуција.
Станува збор за шверц на кокаин од Јужна Америка до различни европски дестинации, но и пошироко, се вели во денешниот извештај на Европол за заканите кон ЕУ од организиран криминал.
– Тие се карактеризираат со силно присуство низ ЕУ и регионот на Западен Балкан. Тие, исто така, воспоставија многу силно присуство во Латинска Америка, искористувајќи ги можностите за корупција во клучните пристаништа и бродските компании. На овој начин вршат сеопфатна контрола врз набавката на кокаин. Некои од овие групи се исто така специјализирани и силно вклучени во различни форми на насилство, професионални киднапирања и егзекуции, корупција, перење пари, трговија со оружје и експлозиви и фалсификувани документи. Насилството главно се користи како одмазда за изгубени или неуспешни пратки на дрога, но и за стекнување доминација над територијата или синџирот на снабдување – се вели во извештајот на Европол.
Како што беше посочено, постојат и криминални групи кои се состојат од припадници на повеќе националности, а тие често дејствуваат во земјите членки на ЕУ додека одржуваат блиски врски со нивните региони на потекло надвор од ЕУ.
– Овие мрежи често го комбинираат членството од различни земји од Западен Балкан и често се фокусирани на српските граѓани. Меѓу нив има државјани на Албанија, Белгија, Босна, Хрватска, Холандија, Германија, Црна Гора, Словенија и Турција. Нивната главна криминална активност е трговија со дрога, пред се кокаин и канабис, а во помала мера синтетички дроги и хероин. Тие се занимаваат и со организиран имотен криминал, шверц на тутун и трговија со луѓе за сексуална експлоатација. Пред се, работат во Белгија, Колумбија, Хрватска, Франција, Германија, Холандија и земјите од Западен Балкан. За некои криминални мрежи нема посебни обрасци во однос на националниот состав – посочува Европол.
Европол укажува дека најопасните криминални мрежи имаат тенденција да се специјализираат во еден клучен криминален бизнис и да работат со висок степен на независност.
