По десет години „финансиско чистилиште“, Грците конечно ја надминаа тешката економска и социјална криза, а светските рејтинг агенции ги ослободија грчките државни обврзници од ознаките на „лоши“ инвестиции. Грција забележа економски раст од над два отсто, но населението сè уште живее скромно, покажуваат официјалните статистички податоци на Евростат.
Само Бугарите живеат поскромно од Грците во ЕУ, бидејќи нивната куповна моќ едвај достигнува 60 отсто од просекот во Европската унија, а според последните податоци на заводот за статистика на ЕУ, куповната моќ и бруто-производот по жител во Западен Балкан е уште послаб – само некаде околу 50 отсто од просекот на ЕУ.
Најбогати граѓани се оние на Луксембург и Ирска, 140 отсто и 112 отсто над просекот на ЕУ, а потоа следат Холанѓаните, Данците и Австријците.
Французите се точно во средината, а на крајот, покрај Грците и Бугарите, се и Литванците, Словаците и Хрватите.
Грција се опорави од кризата трошејќи десет години на огромни долгови од над 360 милијарди евра на сметка на јавните трошоци, платите и пензиите, додека инфлацијата не се намалува, особено цените на храната, бензинот и киријата се високи, така што трошоците за живот се уште се многу високо .
Закрепнувањето на грчката економија се случи на грбот на народот, велат незадоволните синдикати и левичарските економисти, но централнодесничарската влада на премиерот Киријакос Мицотакис укажува на одлични економски резултати и предвидува дека инфлацијата наскоро ќе падне и животниот стандард ќе почне да расте.
-Грција десет години се оддалечува од ЕУ, а во следната деценија ќе се приближи, бидејќи ја врати довербата кај инвеститорите – вели главниот економски советник на премиерот Мицотакис, Алексис Пателис.
Но, колку долго грчкото население ќе треба да чека ова „економско чудо“ да биде корисно за масите, а не само за акционерите, бизнисите, банките и странските инвеститори.
Грците сè уште паметат дека пред европската и светската финансиска криза во 2008 година живееле сосема пристојно, бидејќи бруто домашниот производ по жител на Грција пред тоа бил 95 отсто од просекот во ЕУ.
Сепак, се чини дека нешто започна, бидејќи годинава владата ја зголеми минималната загарантирана плата од 780 евра бруто на 830 евра, иако синдикатите посочуваат дека годишната плата во Грција и понатаму е 25 отсто под просекот на ЕУ.
Населението се уште страда од високите животни трошоци, а според податоците на Централната банка на Грција, 27 отсто од Грците се уште живеат на прагот на сиромаштија.
