Глобалните капацитети на електрани на јаглен се зголемија за два отсто во 2023 година и достигнаа историски максимум, за што првенствено придонесе Кина со изградбата на нови капацитети, се наведува во денеска објавениот извештај на организацијата Глобал енерџи монитор.
Кина додаде 47 гигавати нов производствен капацитет на јаглен минатата година, што претставува 66 отсто од вкупниот нов капацитет. На второ и трето место се Индија и Индонезија, кои исто така додадоа значителна количина на нов капацитет за јаглен. Организацијата, исто така, забележа дека затворањето на електраните на јаглен ширум светот забави минатата година.
Според извештаите, минатата година биле пуштени во употреба 69,5 гигавати електрани на јаглен, додека 21,1 гигавати биле затворени. Според извештајот, глобалниот капацитет на електраните на јаглен се зголеми минатата година за 48,4 гигавати на вкупно 2.130 гигавати.
„Резултатите за 2023 година се аномалија, бидејќи сите показатели укажуваат на спротивен тренд“, изјави директорката на Програмата за јаглен на Глобалниот енергетски монитор, Флора Шампеноа.
Таа посочи дека е потребно побрзо затворање на електраните на јаглен и напуштање на изградбата на нови капацитети.
„Во спротивно, можеме да заборавиме на исполнувањето на нашите цели од Парискиот договор за климата“, нагласи Шампеноа. Според порталот Oilprice, ова е полесно да се каже отколку да се направи бидејќи јагленот сè уште обезбедува основно ниво на енергија за Пекинг што ниту кинеските соларни електрани ниту ветерните електрани не можат да го гарантираат.
Индиската влада минатата година објави дека планира тројно да го зголеми производството на јаглен за да ја задоволи растечката побарувачка на енергија во земјата.
