Американскиот државен секретар Ентони Блинкен денеска во Анкара ќе се сретне со турскиот претседател Реџеп Таип Ердоган, откако тој ги посети подрачјата погодени од земјотресот и најави дополнителна американска помош од 100 милиони долари. Тоа е прво патување на американскиот државен секретар во Турција по преземањето на функцијата пред две години.
Конфликтот во Украина ќе биде на дневен ред на разговорите Блинкен-Ердоган.
Блинкен, кој во неделата дојде од Минхен каде што учествуваше на Конференцијата за безбедност, слета во воздухопловната база Инџирлик во југоисточна Турција и сака да ја изрази американската поддршка на таа земја.
„Додаваме 100 милиони долари за да им помогнеме на оние на кои очајно им е потребна помош“, рече Блинкен, кој со хеликоптер ја обиколи провинцијата Хатај, опустошената од земјотресот.
Турските власти во неделата објавија дека ја прекинуваат потрагата по жртви, освен во Кархаманмараш, каде што е епицентарот на земјотресот, и во провинцијата Хатај.
Ден по земјотресот, американските власти испратија неколку тимови за пребарување и спасување во Турција, околу 200 луѓе и ја дадоа првата транша од хуманитарна помош од 85 милиони долари.
Блинкен ја завршува европската турнеја со посета на Грција, каде ќе престојува вечерва и утре.
