Џесика Честејн не ја допрела златната статуетка на Еди Редмејн затоа што „се чувствувала суеверна“.
Ѕвездата на „Очите на Тами Феј“ тврди дека нејзиниот „Оскар“ е првиот што го допрела, и откри дека одбила да ја држи во раце златната статуетка на нејзиниот пријател, Британецот Еди Редмејн, кој во 2015 година доби „Оскар“ за најдобар актер во главна улога – за брилијантното портретирање на астрофизичарот Стивен Хокинг во „Теоријата на сè“ ( Тhe Theory of Everything).
Зборувајќи на прес-конференција по нејзината победа за најдобра актерка („Очите на Тами Феј“) во неделата вечерта, 45-годишната актерка рече: „Сè уште не можам да сфатам дека држам Оскар во рацете. Ова е првпат да ја држам оваа награда. Јас сум пријател со Еди Редмејн и бев во неговата куќа во Лондон. Присутните ми велеа: ова е неговиот Оскар. И сите го зедоа, а јас бев како: не можам. Ти држи го! Се чувствував суеверно.“
„Значи, ова е првпат. Не размислував каде ќе го чувам, но сигурно ќе го почитувам каде и да е“, им рече таа на новинарите.
