Папата Франциск рече дека е подготвен да отпатува во Украина, која е под руска агресија, но само под услов да може да отпатува и во Москва, пренесе денес германската агенција ДПА.
„Ќе одам на двете места или на ниту едното“, рече поглаварот на Католичката црква во интервју за саботното издание на аргентинскиот весник „Ла Насион“.
На војната во Украина може да ѝ се стави крај само преку дијалог и конкретни мировни иницијативи, рече Папата. Тој веќе размислуваше за патување во тие две земји минатото лето. Во тоа време, тој исто така рече дека сака да ги посети и Киев и Москва. „Ватикан долго време сака да ја игра улогата на посредник во конфликтот во овој контекст“, изјави тој за весникот Ла Насион за неговата „желба да му служи на мирот“
Во интервјуто, папата Франциск објави дека побарал од руските лидери да отпатува во Москва на вториот ден од руската инвазија на Украина. Рускиот министер за надворешни работи Сергеј Лавров, рече тој, во тоа време со благодарност ја одбил понудата. Папата повтори дека е згрозен од војната: „Војната ме боли, тоа сакам да кажам. Војната ме боли“.
Во своите јавни настапи и пред публиката, тој редовно зборува за страдањата на Украинците. Од дипломатски причини, сепак, во нив не ја споменува Русија по име.
