Напаѓачот на Пари Сен Жермен, Килијан Мбапе, откри дека малку недостигало да ја заврши својата репрезентативна кариера минатото лето по елиминацијата на Франција во осминафиналето на Европското првенство.
Тогаш напаѓачот на ПСЖ беше навредуван од фановите и критикуван од француската јавност. Поради грозните навреди сакаше да ја заврши кариерата во репрезентацијата и никогаш повеќе да не го облече дресот на Франција.
„Размислував за тоа најсериозно. Не сакав да играм за луѓе кои ме нарекуваат ‘мајмун’. Бев решен да не играм, но луѓето околу мене ме убедија да не го правам тоа. Мене ми беше најтешко затоа што утнав пенал против Швајцарија, но не заслужив некој така да ме навредува на расна основа. Тој бран на омраза во тоа време беше неверојатен, преполн со расизам“, вели Мбапе.
Тој смета дека Франција има шанса да ја одбрани титулата светски првак.
„Ова е новата Франција и затоа не се откажав од оваа репрезентација. Ние одиме во Катар да се обидеме да ја одбраниме титулата, имаме одличен тим и ќе сториме сè за да го освоиме трофејот“, истакна Мбапе.
