– Мојот и ставот на ДУИ за Исламската верска заедница (ИВЗ) е дека беше скандалозен и срамен чин на упад врз автономијата на уставно загарантираната автономија на верските заедници, во овој случај на ИВЗ, изјави денеска вицепремиерот за европски прашања Бујар Османи.
Затоа, продолжи, државата треба да ги преземе сите мерки да ја гарантира оваа независност и оваа автономија на верските заедници вклучувајќи ја и ИВЗ.
Проблемот во ИВЗ ескалира вчера попладне кога со одлука на судот за нов поглавар на ИВЗ беше назначен Скендер Бузаку, кој најави дека од денеска го презема раководењето со верската заедница. Тој притоа напомена дека ја повикал финансиската полиција да ги детектира неправилностите во работата на раководните тела на ИВЗ.
На тоа реагираше Ријасетот на ИВЗ и лично реисот Реџепи, обвинувајќи ги Комисијата за верски заедници и владата за грубо мешање во нивната работа.
Портпаролот на Владата Миле Бошњаковски по повод ова прашање претпладнево, на редовната прес конференција, истакна дека Северна Македонија е секуларна држава и Владата не се меша во работата на верските заедници.
Во врска со обвинувањата на реисот Сулејман Реџепи упатени кон Владата, Бошњаковски истакна дека Владата осудува говор на омраза, како и секогаш досега и додаде дека институциите што се вклучени во одредени проблематики што се случуваат во ИВЗ ќе го дадат и својот збор во дадено време.
И Комисијата за односи со верските заедници и религиозни групи денеска остро демантираше каква било нивна вмешаност во последните случувања и превирања во Исламската верска заедница (ИВЗ), за што синоќа беше обвинета од реис ул улемата на ИВР Сулејман Реџепи.
Во синоќешниот настап, по одржаната вонредна седница на Ријасетот на ИВЗ, Реџепи во дел од својата изјава ги обвини директорот на Комисијата за односи со верските заедници и владата дека се вмешани во последните случувања во Исламската верска заедница.
