Со манифестации во неколку места, денеска во Косово се одбележува Денот на лицата исчезнати во косовско-српскиот конфликт во 1998-99 година, јави дописникот на МИА од Приштина.
Централниот собир, со кој традиционално се одбележува овој датум и на кој ќе присуствуваат високи државни претставници и амбасадори акредитирани во Косово, е закажан за во Ѓаковица, градот со најмногу луѓе за чија судбина не се знае ништо уште од последната војна.
Претходно ќе бидат одадени почести кај Обелискот на исчезнатите во Приштина и во Меморијалниот комплекс во селото Меја, во близина на Ѓаковица, каде што на денешен ден пред 20 години српските сили, во знак на одмазда за убиството на петмина полицајци од страна на Ослободителната восјка на Косово (ОВК), извршија масакр врз над 300 албански цивили.
Вкупниот број на исчезнати во цело Косово, Албанци и Срби, според податоците на Црвениот крст, на „Хјумен рајтс уоч” и на други меѓународни и домашни организации, е околу 1.650 лица.
