Натпреварот помеѓу Орландо меџик и Сакраменто кингс со кој почна синоќешната богата програма во НБА лигата, уште долго ќе го паметат сите кои го гледаа. Гостите од Калифорнија победија со 126-123 по продолжение од пет минути, а победничкиот кош беше тројка на Дарон Фокс речиси од центарот на теренот.
Завршницата беше супер интересна, Орландо намали на 121-123 на 11,7 секунди до крајот, а пресингот им се исплатеше на Магичните, бидејќи ја украдоа топката и со забивање изедначија на 123-123 на 6,5 секунди до крај. Гостите беа во шок, добиениот меч им се лизна од раце, но Фокс со звукот на сирената погоди тројка од голема далечина и голема радост.
De’Aaron Fox drains the #TissotBuzzerBeater for the win from BEYOND! #ThisIsYourTime pic.twitter.com/BwYotIU2cA
— NBA (@NBA) November 5, 2022
Фокс даде 37 поени, а голем придонес даде и Сабонис со 25 поени и 11 скока. Кингс почнаа со 0-5, а оттогаш имаат четири победи на наредните пет меча. Кај Орландо, првиот пик Паоло Банкеро беше одличен со 33 поени и 16 скока.
Бостон селтикс постави клупски рекорд од 27 погодени тројки, и победи против Њујорк никс со 133-118. Милвоки и понатаму нема пораз, а деветтата победа по ред ја извојуваа против Оклахома сити.
Кошаркарите на Денвер убедливо на свој терен славеа против Сан Антонио со 126-101, во меч во кој најдобар поединец беше српскиот центар Никола Јокиќ кој запиша нов „дабл-дабл“.
Јокиќ дуелот го заврши со 21 поен, шест скока и десет асистенции, како втор стрелец во редовите на Нагетс, веднаш зад Хиланд.
Српскиот центар повторно го разигруваше тимот и со бројни асистенции, издвојувајќи и едно додавање од третата четвртина кое ги воодушеви навивачите на неговиот тим.
