Војната во Украина уништува шуми, ги загадува ораниците што се полни со мини, а и водата е загадена, предупреди украинскиот министер за животна средина Руслан Стрилец.
Тој во обраќањето пред учесниците на неформалниот состанок на ЕУ во Прага, која претседава со Унијата, рече дека руската инвазија уништила три милиони хектари украински шуми.
Според него, во Украина се регистрирани најмалку 260 случаи на „екоцид” и повеќе од два илјади случаи на предизвикана еколошка штета, а 20 отсто од заштитените подрачја во државата се загрозени.
„Кога ракета ќе падне во национален парк и кога ќе изгорат илјада хектари шума, тоа е екоцидно. Зошто Русија води војна која уништува диви животни? Дивите животни не можат да се бранат, но сепак се стрелаат проектили врз нив. Зарем тоа не е екоцид?”, изјави Стрилец.
Тој додава дека руската војска извршила и повеќе од 40 напади врз складишта за нафта во Украина, што предизвикува сериозно загадување на воздухот.
„Проблем е и водата за пиење… Русите ги уништуваат станиците за третман на вода”, рече тој, додавајќи дека западна Украина каде се преместени бегалци од истокот на земјата моментално се соочува со проблеми во водоснабдувањето.
Министрите за животна средина на ЕУ ветија помош за Киев, а чешката министерка Ана Хубачкова рече дека членките на Унијата од 27 нации би можеле да помогнат во мапирањето и анализата на штетите, како и да достави соодветна финансиска помош.
„Има многу идеи, многу предлози за кои сметам дека може да се координираат”, рече Хубачкова.
Стрилец вели дека Германија понудила 20 милиони евра за да и помогне на Украина да ги обнови природните ресурси.
„Сите европски земји се подготвени да ни помогнат. Многу е корисно да се биде овде денеска. Ги слушам нивните идеи… и сигурен сум дека тоа ќе ми помогне да подготвам обновена програма за зелениот курс на Украина”, додаде тој.
Германската министерка Штефи Лемке рече дека е неопходно да се обезбеди „итна помош за критичната инфраструктура”, без да се чека на повоеното закрепнување на Украина.
Хубачкова додаде дека Прага би можела да го искористи своето искуство од четирите години минати под тоталитарна комунистичка власт предводена од Москва, и да и помогне на Украина да ги расчисти минираните области.
„Тука имаше руска војска, исчистивме мини, го имаме искуството. Доколку побараат да помогнеме во чистењето, со задоволство би го направиле тоа”, рече таа.
