Легендарниот фудбалски тренер Мирослав Ќиро Блажевиќ веќе подолго време се бори со тешка болест. Во интервју за хрватските медиуми тој не делува оптимистички и верува дека овојпат нема да може да го победи малигното заболување.
Поранешниот селектор на фудбалската репрезентација на Босна и Херцеговина има рак на простата и е во доцните години. За среќа не паднал во кревет, но свесен е за годините и за тежината на болеста со која се бори.
„Мојот син доаѓа и вели – тато, кажаа дека ќе умреш и пред пет години. Тој сака да ја ублажи вистината, а лекарите се откажаа од мене“, изјави Чиро за „Story.hr“.
„Дојде времето за мене, имам 88 години, многу оставив зад себе. Што ќе правиш. Ја кажувам вистината, а тоа е дека имам рак со пет метастази. Тогаш тоа е фатално. Во било која случај, не жалете за мене, направив премногу за да не бидам мирен. Премногу добро. Колку и да се трудам, не можам да најдам кому сум му згрешил. Кога ќе ги погледнам моите колеги, речиси сите починаа: Бариќ, Ивиќ, Зебец. Дојде и моето време. Човек треба да се помири со тоа, без да кука и да се жали. Затоа би ги замолил луѓето – поштедете ме од тага, затоа што мирно си одам и тоа е многу убаво“, истакнува Мирослав Блажевиќ.
Се пожали и дека ќерките повеќе од една година не му се јавиле да го прашаат за неговото здравје.
„Имам рак една година и три месеци, а оттогаш моите ќерки не прашуваат: Како си, тато? Слободно објави го ова“, порача Ќиро.
