Заев денеска во Анкара на средби со Ердоган и Јилдирим
Премиерот Зоран Заев во рамки на официјалната посета на Република Турција денеска ќе има средба со премиерот Бинали Јилдирим.
Турскиот премиер Јилдрим ќе официјално ќе го пречека Заев, а потоа двајцата премиери ќе имаат тет-а-тет средба по што ќе следува и средба на делегациите од Македонија и Турција. Јилдирим и Заев потоа ќе одржат и заедничка прес-конференција.
Во текот на денот, премиерот Заев предвидено е да се сретне и со претседателот на Собранието на Република Турција Исмаил Кахраман и со претседателот на државата Реџеп Таип Ердоган.
Заев официјалната посета на Република Турција ја почна синоќа со обраќање пред претставниците на ТОББ, Сојузот на стопански комори и берзи на Република Турција. Тој истакна дека постојат можности за унапредување на економската соработка меѓу Република Македонија и Република Турција. Исто така нагласи дека нашата цел е за неколку години трговијата со Турција да биде една милијарда евра.
Како што соопшти владината прес-служба, Заев на официјалната посета е придружуван од министерот без ресор задолжен за странски инвестиции Аднан Ќахил, пратениците во Собранието на Република Македонија Енес Ибраими и Јусуф Хасан и државниот секретар во МНР Виктор Димовски.
