Краделе автомобили во Скопје: Едниот го продале за 5.000 денари, со другиот направиле сообраќајка
Секторот за внатрешни работи Скопје, Единица за имотни деликти и малолетничка деликвенција, до Основното јавно обвинителство Скопје ќе поднесе кривична пријава против Н.Д. (26), С.Д. (19) и Н.Б. (18), сите од Велес, поради постоење основи на сомнение за сторени три кривични дела тешки кражби, казниво по член 236 од Кривичниот законик на Република Македонија.
Пријавените најпрвин на 31.12.2017 година во периодот од 17 до 18 часот, на паркинг-просторот пред зграда на улица Бојмија, одзеле патничко возило „опел кадет“ со скопски регистарски ознаки, сопственост на С.С. од Скопје. Истиот ден на улицата Ѓорче Петров со возилото предизвикале сообраќајна незгода по што го оставиле возилото и побегнале.
Потоа, на 5 овој месец, во периодот од 15 до 17 часот на улицата Никола Карев одзеле патничко возило „застава југо 55“ со скопски регистарски ознаки, сопственост на П.Ј. од Скопје, по што побегнале во непознат правец. Наредниот ден од страна на полициски службеници возилото е пронајдено и одземено од А.И. (40), кому од страна на пријавениот Н.Д. му било продадено возилото за сума од 5.000 денари.
Исто така, на 8 овој месец во периодот меѓу 15 до 17.30 часот од паркинг на булеварот Кузман Јосифовски – Питу одзеле патничко возило „југо корал“ со скопски регистарски ознаки, сопственост на М.Д. од Скопје. Тие го однеле возилото во Тетово, каде што се обиделе да го продадат.
