Ќе се дебатира за соработката на странските инвеститори и локалните добавувачи
Соработката меѓу странските компании и локалните добавувачи ќе се подобрува преку проект што ќе го спроведат Советот на странски инвеститори и Стопанската комора на Македонија, со Машинскиот факултет при Универзитетот „Св. Кирил и Методиј“ во Скопје.
За можностите за зголемување на соработката денеска Советот на странски инвеститори организира тркалезна маса во Стопанската комора на Македонија.
Со двегодишниот проект ќе се подобрува работењето на одредени локални компании за да се зголемат конкурентноста и капацитетите за подобра соработка со странските инвеститори во државава, за тие да можат да бидат вклучени во системот на добавување.
Проектот е финансиран од фондови на Европската унија во рамки на Инструментот за претпристапна помош (ИПА) и се спроведува во партнерство со Виенскиот универзитет за технологија – Институт за менаџмент во науката, со поддршка на Владата на Република Македонија.
На тркалезната маса е најавено обраќање на вицепремиерот за економски прашања Кочо Анѓушев, на претседателот на Советот на странски инвеститори, Штефан Петер, деканот на Машинскиот факлултет Скопје проф. д-р Дарко Данев, како и проф. д-р Роберт Миновски, водечки партнер и професор на Машинскиот факултет во Скопје.
