Генералниот секретар на СДСМ, Александар Кирацовски, придружуван од организациониот секретар Миле Зечевиќ во текот на вчерашниот ден ги посети општините Крива Паланка, Кратово и Ранковце.
На средби со граѓаните Кирацовски разговарал за повеќе актуелни теми, а се осврнал и на Договорот со Грција, за кој рекол дека става крај на две и пол деценискиот спор што земјата ја влечел надолу.
„Имаме Договор кој со право се нарекува историски, затоа што го обезбедува и зајакнува македонскиот идентет еднаш засекогаш и ја отвора вратата за членство во ЕУ и НАТО. Ова е шанса, сите ние заедно, да испишеме нова, светла страница од историја за нашата држава“, рекол генералниот секретар на СДСМ.
Додал дека со ова трасира патот на загарантирана стабилност и безбедност, јакнење на институциите и владеење на правото, заживување на економијата, инвестиции, поголеми плати, нови работни места и повеќе пари за граѓаните.
Кирацовски ги повикал граѓаните да излезат на престојниот референдум и да кажат „да“ за македонската иднина.
„Да ја искористиме таа можност и да кажеме ‘да’ за Договорот кој успеа да го зачува и гарантира македонскиот идентитет и македонскиот јазик. Да кажеме ‘да’ за македонската иднина и просперитетна европска Македонија“, повикал Кирацовски, додавајќи дека сите политички субјекти треба одговорно да се однесуваат и да овозможат граѓаните слободно да ја изразат својата волја.
