Неспособниот Мицкоски нема визија ниту план, тој е дел од темното минато кое граѓаните го поразија, сега Македонија оди напред, кон НАТО и ЕУ, реагира СДСМ на обвинувањата на лидерот на ВМРО-ДПМНЕ, Христијан Мицкоски, на протестот во Прилеп.
„Неспособниот Мицкоски нема што да понуди пред граѓаните освен деструкција и протести за одбрана на криминалите на неговиот ментор Никола Груевски. Мицкоски нема визија за иднината на државата, нема ниту план, нема идеја за најважните прашања. Граѓаните го гледаат сето тоа, ја гледаат разликата помеѓу неспособниот Мицкоски и ВМРО-ДПМНЕ од една и одговорната Влада предводена од СДСМ од друга страна“, велат од СДСМ.
Од едната страна, велат од партијата, СДСМ има јасен план, државата е ставена на шини што водат до просперитет, а тоа е членство во НАТО и ЕУ, преку договорот од Преспа,а од другата страна се ВМРО-ДПМНЕ и Мицкоски со нивната безидејност, противење на западните вредности и отсуство на каква било идеја за тоа по кој пат треба да се движи Македонија.
„Од едната страна светла иднина и јасна перспектива – од другата магла и темнина. Од една страна е антизападното раководство на ВМРО-ДПМНЕ и Мицкоски кои ги бранат криминалните политики на рекет и драконски казни што ги осиромашија граѓаните. Од друга страна СДСМ создава можности, ги намалува казните за 75%, обезбедува инвестиции и повеќе пари кај граѓаните“, велат од СДСМ.
