Да се лоцираат поголемите загадувачи наместо да ги обвинувате граѓаните за лоши навики и неодговорност, порача Дајанчо Ефтимов од ВМРО-ДПМНЕ, кој во изјава за медиумите од Струмица рече дека овој град подолго време е на врвот од светската топ листа на загадување на воздухот и иронично кажано го надминал епитетот ,,Европска Струмица”.
„Едно од можните решенија од времето кога денешниот премиер беше градоначалник беше гасификација на институциите. Имено, се обвинуваа државните институции заради наводно намерното избегнување на процесот на гасификација, а истите според наши сознанија и денес не се приклучени. Односно, да го побараме решението за кое наводно пречка беше ВМРО-ДПМНЕ. Очигледно генералната политика не може да донесе реална гасификација на земјата, но барем проектот виртуелна гасификација да го намали загадувањето. Дали со приклучувањето на институциите би станала економски исплатлива инвестиција и би се намалила цената на трошоците за користење на овој енергенс па веројатно и домаќинствата ќе може да се приклучат“, истакна Ефтимов.
Додаде дека очигледно, загадувањето е предизвик владата со сите најповикани и одговорни лица од регионов да направат се што можат за да ги приклучат државните органи и општински институции на гасоводот во Струмица како конкретно решение за вонредното големо загадување на воздухот директно штетно по здравјето и животот на граѓаните и регионот.
