Оливер Спасовски може да го злоупотребува МВР и медиумите и да лаже дека Скопје е побезбеден од Стокхолм и дека тоа е благодарение на него, но реалноста за жал е сосема поинаква, рече денеска во изјава пред Министерство за внатрешни работи, Орце Ѓорѓиевски, член на ИК на ВМРО-ДПМНЕ.
Како што истакна тој, во Скопје владее безредие, а на удар се банки, бензински станици, локали и буквално секој што поседува пари или било каков имот.
„Криминалот царува, особено пред избори кога партиите од власта не бираат средства за да ги наполнат нивните каси. Криминалците оперираат, Спасовски не презема ништо и затоа отворено се сомневаме дека постои отворена спрега меѓу нив“, рече претставникот од опозициската партија и додаде дека хаосот и незаконието стануваат редовна појава на улиците на Скопје.
Само во 24 часа сведоци сме на фрлени бомби во угостителски објект и вооружен грабеж како од филмска сцена, кажа тој.
„Синоќа во 1 часот и 35 минути по полноќ на угостителски објект во близина на Бит-пазар е испукан проектил од рачен фрлач, при што е оштетен објектот каде што е фрлен проектилот, но оштетени се и соседните објекти. МВР случајот уште го нема расчистено. Се молчи и за опожарено возило на сопственик на неколку казина. Во третиот случај со закана со автоматски пушки ограбена е експозитура на ‘Халк банка’ во Визбегово на Качанички пат. Разбојниците украле непозната сума на пари. Како на филм ги легнувале на земја вработените и им се заканувале дека ќе ги убијат. МВР и во овој случај не реагира. Сторителите се непознати, а штета е направена“, образложи Ѓорѓиевски.
Во обраќањето тој порача дека граѓаните заслужуваат да живеат во стабилна држава, а, како што рече, СДСМ не е во состојба да го осигура јавниот ред и мир и додаде дека порастот на криминалот е уште една причина за предвремени парламетарни избори заедно со претседателските.
