Косовскиот претседател Хашим Тачи изјави дека ќе поднесе оставка или ќе распише референдум ако Собранието не го одобри договор со Белград.
Според тој договор, на Косово би му припаднале три општини од централна Србија – Бујановац, Прешево и Медвеѓа.
Тачи за приштинската телевизија „Репортер” прецизира дека оставката ќе ја поднесе во случај да биде договорено со Белград припојување на тие три општини со Косово, а Парлемантот не прифати таков договор.
– Тие кои ме критикуваат не би требало да мислат дека би го прекршил Уставот. Никогаш не би го прекршил Уставот, но да се смени тој, тоа да. Можеме да постигнеме договор, а потоа да го изнесеме пред Собранието на Косово, кое може да го усвои или не, рече Тачи, додавајќи дека во тој случај ќе поднесе оставка или ќе распише референдум.
Тој повтори дека Приштина не може поради „непријателството” со Белград да го загрози стратешкиот сојуз со САД и порача дека треба да се укине таксата за стока од централна Србија.
