Германија има намера да им го одземе државјанството на борците на Исламската држава, објавија германските медиуми.
Планот, договорен од министерот за внатрешни работи Хорст Зехофер и министерката за правда Катарина Барли предвидува одземање на германски пасош на борците на Исламската држава од Германија, ако имаат друго државјанство, ако се возрасни и ако учествуваат во борбите. Тоа го тврдат весникот „Зидојче цајтунг”, како и телевизиите НДР и ВРД.
Според сегашниот закон, можно е да се одземе германското државјанство ако некој Германец доброволно, без одобрение од Министерството за одбрана, одлучи да пристапи во странска вооружена формација.
Законот ќе биде дополнет, според медиумите, а сето тоа е во врска со барањето на американскиот претседател Доналд Трамп дека Европа треба да преземе повеќе од 800 борци на Исламската држава од стариот континент кои се во заробеништво, како и да им се суди.
