Железниот сообраќај меѓу Индија и Пакистан од денеска е нормализиран, што е уште еден знак за намалување на тензиите меѓу двете нуклеарни сили, по конфликтот за спорната територија Кашмир, изјавија денеска претставници од железницата на Пакистан.
Портпаролот на железницата, Ејаз Шах, рече дека воз со околу 180 патници во понеделникот го напуштил градот Лахор во источен Пакистан и се упатил кон пограничниот индиски град Атари, објави агенцијата АП.
Минатата недела Пакистан го прекина железничкиот сообраќај со Индија, по ескалацијата на конфликтот.
Пакистан на 27 февруари соопшти дека соборил два индиски воени авиона, само еден ден по воздушните напади на Индија врз пакистанскиот дел на Кашмир, во знак на одмазда за самоубиствениoт напад врз индиски војници во Кашмир на 14 февруари. Во тој напад загинаа најмалку 40 војници.
До намалување на тензиите дојде како резултат на заложбите на светските сили, како и враќањето на заробениот индиски пилот од Пакистан.
